Nagapati ka man sa Mutya nga Bato?
Sa Barangay Agcarope, Janiuay, Iloilo, isa ka babayi ang nadala gid sa matam-is nga mga tinaga sang gina-alegar Ati nga nag-uyat sang iya nga kamot. May bonus pa ang amo nga Ati sang nagpadulong ini sa ila nga balay: ‘mutya kag espesyal nga bato’.
“Ma-wish kuno ako it seven ka wishes. Gin-uyatan ya ang kamot ko. Tapos gin-pawish na ako ka pito ka wish. Antes siya nagpa-wish sa akon, may Mutya kuno siya nga gin-prepare nga waay naghulag sa iban nga tawo. If maghulag kanakon kuno, okay ang wish ko.”
Ini ang panaysayon ni Alias Ging-ging, residente sang amo nga lugar.
Suno sa natungdan, sang nagligad nga semana, apat ka mga babayi ang nag-abot sa iya nga tiangge. Duha sa sini nga mga babayi ang Ati. May tanyag ang mga babayi nga bag nga ginbakal man ni Ging-ging. Ginpakaon pa ni Alias Gin-ging ini nga mga babayi kag sang ulihi, nagsulod pa ini sa iya nga tiangge.
Sini nga tion, lain na ang offer sang isa ka ati: hibaluon sini ang swerte ni Ging-ging.
“Special kuno ang bato,” rason ni Ging-ging kun ngaa nagpati siya sa babayi nga indi man niya kilala. Pahayag niya, nagpati gid siya nga espesyal ang mutya nga bato bangud ginapahayag nga halin ini sa Dumaguete.
“Tapos ka wish ko, ginbutang ya ang bato sa pinggan nga may langgaw kag grabe ang kuba-kuba sang dughan ko kay naghulag ang bato! Nagpati ako nga tuod. Tapos, daw nakibot man siya, ang hambal ya, ‘baw grabe ka Ma’am! Naghulag sa imo ang bato. Ikaw gid ang ginpili sang mutya nga bato.”
Bangud luyag man ni Alias Ging-ging nga maangkon niya ang ‘future kag luck’ nga lakip sa iya nga gin-wish, ginbaton niya ang mutya nga bato — kabaylo sang P3,700 nga bayad sa amo nga Ati.
Ginpalab-ot ni Ging-ging ini nga reklamo sa Bombo Radyo matapos nabatian sang nagligad nga semana nga may natuntuhan man nga tigulang sa Barangay Mañacabac kun sa diin P13,000 gid ang nakuha kabaylo sang pagpabutbot sini sa ginaalegar mga Ati.
Duda ang tag-reklamo nga isa lang ukon may kaangtanan ang mga babayi nga nagkadto sa iya kag ang nagtunto man sa tigulang sa Barangay Mañacabac.
Base sa kuha sang CCTV, pareho man ang panapton sang mga Ati nga nagpalapit kay Gingging sa mga Ati nga ginapahayag nagtunto sa isa ka tigulang sang nagligad man nga semana.#
