“Immoral” ang tawag ni vaccine czar Sec. Carlito Glavez Jr. sa mga “vaccine hoppers” ukon mga Filipinos nga nagaparehistro sa iban nga mga lugar sa pungsod agud makakuha sang third dose sang COVID-19 vaccine.
Suno kay Galvez, makabig nga iligal ang vaccine hopping.
Tanan nga bakuna pahayag niya ang ginakabig nga bulawan kag indi ini dapat nga pag-uyangan bangud luyag sang gobyerno nga mabakunahan ang tanan.
Ginasiguro sang chief implementer sang National Task Force against COVID-19 nga lagson nila ang mga nagalapas sa pagsulundan sa pagpabakuna.
May mga tawo pa nga yara sa far-flung areas suno kay Galvez nga bisan first dose ang wala pa makapabakuna samtang may mga tawo naman nga nagadali-dali nga makakuha sang third dose ukon boosters.
Unahon anay pahayag ni Galvez ang mga tawo nga wala pa nakabaton sang first dose.
Nahibaluan nga may reports nga nagguwa nga may mga fully vaccinated na apang nagpatublok pa sang Moderna vaccine bilang booster shot.
Gin-athag man ni Department of Health Undersecretary Maria Rosario Vergeire nga ginadumilian ang booster shots sa pungsod bangud limitado ang supplies sang bakuna kag bangud sa kakulang sang safety validity sa subong.
