Ginpulihan kastigo sang walo ka mga menor de edad ang mag-utod sa Reclamation area sang Poblacion 2, Estancia, Iloilo sa diin patay ang magulang matapos naman ginbuno.
Ang mga biktima amo sanday Jaypee Francisco, 33, sa diin gindeklara ini nga dead on arrival samtang pilason naman ang manghod niya nga si John Dee, 27, lunsay mga residente sang Barangay Bayuyan, Estancia kag nagatrabaho sa port.
Sa interview sang Bombo Radyo kay PLt. Jobert Amado, Officer-in-charge sang Estancia Municipal Police Station, iya ginpahayag nga patal nga pilas sa likod ang naangkon sang magulang nga nangin tunaan sang iya kamatayon.
Suno kay Amado, anom pa lang nga mga suspek ang natigayon nga nadakpan sang mga kapulisan kag padayon pa ang hot pursuit operation sa duha.
Base sa imbestigasyon, posible nga triping-triping lang sang mga menor de edad ang pagpangastigo kag pagbuno ukon may yara sang daan nga hiligut-anon sa tunga nila sang mga biktima.
Kaso nga murder kag frustrated murder ang kaso nga ipasaka batok sa mga suspek.
