Hugot ang pagpati sang isa ka estudyante sa Lemery, Iloilo nga kun ano ka tam-is ang ginabaligya niya nga bitso-bitso, amo man ang sabor sang kadalag-an nga malab-ot niya sa ulihe sa iya wala untat nga paghimakas sa kabuhi.
Siya amo si Vince Perales, third year student sang Northern Iloilo Polytechnic State College, Lemery Campus, proud nga manugbaligya sang bitso-bitso humalin sang lamharon niya nga edad.
Sa interview sang Bombo Radyo kay Perales, iya ginpahayag nga anom siya ka-tuig sang nagtaliwan ang iya nga amay, apang bisan isa ka bes, wala ginpabatyag sang ila nga iloy nga may yara sang kulang sa ila pamilya sa diin ini ang ila ehemplo sang duha pa gid niya ka mga utod
Suno kay Perales, humalin sang una, nagalibod na si iloy niya sang home-made nga bitso-bitso, barbecue, combo, maja blanca kag iban pa.
Diri kag natun-an man sang estudyante kun paano magluto sang ila mga baligya agud nga makabulig sa iya iloy.
Bitbit ang tig-lima ka pesos nga bitso-bitso kag combo, gintanyag ini ni Perales sa iya mga classmates kag kun wala sang klase, nagadul-ong man siya sang iya mga baligya sa ila Munisipyo.
Bangud man diri, nakasupot siya sang kwarta agud maka-down payment sang ila service nga motorsiklo agud makadul-ong sang order sang ila baligya.
Tuman man ang pasalamat niya sa iya nga iloy nga nagserbe bilang ehemplo kag kusog niya sa kabuhi.
Abiso ni Perales sa kaangay nga mga estudyante, wala sang mas matam-is pa sa kadalag-an kun halin ini sa kaugalingon nga paghimakas rason nga nagakadapat samtang may kahigayunan kag may tinion nga makabulig sa ginikanan, gamiton ang tanan nga ikasarang agud nga mangin ehemplo man sa iban.
‘PAGTUO SA HANDOM’
Nakapatindog sang production center ukon little bakeshop sa edad nga 20 anyos ang isa ka estudyante sa Barangay Napnapan Norte, Tigbauan, Iloilo.
Siya amo si April Boy Cansancio Trogani, third year college student na subong sa Iloilo Science and Technology University (ISAT-U) Miagao Campus.
Sa interview sang Bombo Radyo kay Trogani, iya ginpahayag nga kun nagahabok sang libro kag notebook ang bag sang iban niya nga classmates, nagahabok naman ang bitbit niya nga bag sang baligya nga chi-chirya kag iban pa nga pagkaon.
Suno sa estudyante, humalin sang elementarya, nagabulig na siya sa iya ginikan kadungan man sang pagbalanse niya sang iya pagtuon.
Ika-anom si Trogani sa pito ka mag-ululutod sa diin siya lang ang nakahilig sa pagluto kag napinsaran niya nga gamiton ini para sa iya handom — amo ang pagtukod sang bakeshop para sa iya negosyo.
Bangud sa iya wala pahuway nga pagbaligya sang mga pagkaon nga ginatanyag niya sa sulod sang ila eskwelehan, nakatipon siya sang kwarta kag amat-amat nga ginpatindog ang iya gamay nga bakeshop.
Lakip sa mga baligya sa bakeshop ni Trogani amo ang iya specialty nga brownie kag suman.
Nagapati ang natungdan sa kadalag-an sang iya negosyo rason nga gintinguhaan niya nga makapatindog sang iya kaugalingon nga production center kun sa diin man siya nagapuyo subong.
Pahayag niya, wala sang imposible sa tawo nga may determinasyon kag pagtuo sa iya handom.
