Nagpa-gwa sang bag-o nga pagsulundan si Guimaras Governor Samuel Gumarin sa diin indi na pagbatunon sa trabaho ang mga wala pa nabakunahan batok sa COVID-19 lakip na ang mga nagapamatok diri.
Sa interview sang Bombo Radyo kay Guimaras Vice Governor Atty. John Edward Gando, iya ginpahayag nga indi na pag-i-renew ang kontrata sang mga job hire employees nga indi fully-vaccinated.
Required man ang vaccination para sa mga regular employees.
Gin-athag sang bise-gobernador nga ang local government unit sang probinsya sang Guimaras ang wala nasakupan sang pagsulundan sang Department of Labor and Employment (DOLE) kag Department of Health (DOH) rason nga may poder ang gobyerno sa pagmando sang nagakaigo nga tikang para sa seguridad sang tanan sa tunga sang pandemya.
Suno naman sa DOLE Region VI, ang private sector lamang ang nasakupan sang ila pagsulundan sa diin ginadumilian ang termination ukon pagpahalin sa trabaho sa mga empleyado nga wala nabakunahan batok sa COVID-19.
Sa interview sang Bombo Radyo kay DOLE VI spokesperson John Mandario, iya ginpahayag nga sa idalom sang Labor Advisory Number 3, ginamanduan ang mga establisyemento lakip na ang employers sa pribado nga sektor nga engganyuhon ang mga empleyado nga magpaidalom sa COVID-19 vaccination.
Apang sa tion nga magpamalibad ukon magpamatok ang empleyado sa pagpabakuna, ginadumilian ang ‘No vaccine, no work’ nga polisa.
Nagakadapat man suno sa iya nga indi maapektuhan ang sweldo, promosyon kag iban pa nga benepisyo sang empleyado.
Apang ini nga pagsulundan ang para lang sa pribado nga sector ukon establisyemento.
