ILOILO CITY- Nakasandig na sa local chief executive sang barangay ukon banwa ang pagpatuman sang Executive Order No. 320 nahanungod sa zoning containment strategy kag barangay quarantine sa critical areas sa probinsya sang Iloilo.
Sa interview sang Bombo Radyo kay Iloilo Governor Arthur Defensor Jr., iya ginpahayag nga kabahin ini sang pagbalanse sang mga tikang sang probinsiya agud nga malikawan ang paglapta sang kaso sang COVID-19 sa tunga sang pagkadiskubre sang iban pa nga variants nga mas makalalaton.
Suno kay Defensor, humalin Agusto 17 tubtob 31, may poder ang mga local chief executives nga ipatuman ang Executive Order 320 sa syudad, banwa, barangay, ukon zona nga may clustering sang COVID-19 cases kag iban nga indicators nga ginplastar sang Inter-Agency Task Fore.
Sa idalom sang EO, ginadumilian ang non-essential travel pasulod kag pagwa sa mga barangays/zones magluwas lang sa mga Authorized Persons Outside of Residence (APORs).
I-require man ang quarantine pass para sa essential travel gikan sa Punong Barangay.
Isa lang ka member sang balay ang tugutan nga magbakal sang essential goods.
Ang mga non-government APORs nga nagatrabaho ukon naga-negosyo sa iban nga livelihood sectors ang dapat mag- secure sang quarantine pass halin sa Punong Barangay amo man ang mga APORs nga nagabyahe para sa medical ukon humanitarian reasons, kag ang mga magapabakuna.
Ang mga travel para sa medical emergencies ukon crisis response ang indi na pagpangayuan sang quarantine pass ukon iban nga requirements.
