ILOILO CITY- Nagapabilin sa gihapon sa Gegato-Abecia Funeral Parlor and Crematory ang bangkay sang 12-anyos nga special child nga COVID-19 positive.
Una na nga nagreklamo si Juvy Geronimo, iloy sang bata bangod iya gin-alegar nga ginpasa-pasahan ini sang punerarya matapos nga una nga gindala sa A. Sumagpao Funeral Service & Cemetery sa Santa Barbara, Iloilo antes ini ginpasa sa nasambit nga crematorium.
Sa interview sang Bombo Radyo kay Arnulfo Sumagpao, tag-iya sang punerarya sa Sta. Barbara, Iloilo, iya ginpahayag nga direct burial na gid lang ang pinakamaayo nga himuon sa bangkay bangod nga indi man ini ma-cremate.
Suno sa iya, mangin ang pamilya sang bata ang indi man makahulag bangod lunsay naka-quarantine ang mga ini sa ila ginarentahan nga balay sa Balabago, Jaro, Iloilo City kag indi man makamato-mato ang punerarya sa pagpalubong sa bata.
Magluwas diri, wala man sang ginauyatan nga mga nagakaigo nga dokumento ang pamilya nga kinahanglanon agud mapalubong na ang biktima.
