Posible nga indi na pagdayunon ang re-enactment sa kontrobersyal nga drug buy bust operation sang Hunyo 29 sa North Baluarte, Molo, Iloilo City.
Ang biktima amo si Karl Daniel Bolante, 27, nga amo ang naluthangan-patay sa operasyon.
Matandaan nga ginpasakaan sang kaso nga grave irregularity in the performance of duty si Police Corporal Rodante Lopez, operatiba sang Iloilo City Police Station (ICPS) 1 – Station Drug Enforcement Team kag una nga nag-ako sa pagluthang–patay kay Bolante.
Samtang mangatubang man sang kaso nga irregularity in the performance of duty based on the doctrine of command responsibility si Police Captain Shella Mae Sangrines, hepe sang ICPS 1, kag amo ang nangin supervisor sa ginpatigayon nga drug buy bust operation.
Sa interview sang Bombo Radyo kay Police Col. Calixto Mabugat, chief sang Regional Internal Affairs Service (RIAS) VI, iya ginpahayag nga nagapadayon na subong ang summary hearing proceedings sa mga nasambit nga police personnel nga involved sa kontrobersyal nga drug buy bust operation.
Sa subong, ginahulat na lang ang mangin rekomendasyon sang summary hearing officer agud mapasa sa pamunuan sang Police Regional Office VI.
