Ginpa-Bombo ang developer sang National Housing Authority (NHA) sa Barangay Bolilao, Dumangas, Iloilo.
Nahibaluan nga ginabanta apat na ka-tuig nagapatindog sang housing project sa nasambit nga lugar.
Sa interview sang Bombo Radyo kay Jerry Dillo, tagreklamo, iya ginpahayag nga nagkalaguba na ang ila mga pananom sa atubang sang ila balay bangud ginatampukan sang madamo nga limestone ukon mga dalagko nga bato kag iban pa nga construction materials.
Suno kay Dillo, sang una pa lang, wala na sila ginpahibalo kaangot sa housing project.
Ginkumpirma niya nga nakaatubangay na sila sang developer kag nagpasalig ini sang land disturbance compensation, apang tubtob subong, wala pa ini nahatag.
Nagapanawagan man ini sa NHA nga hatagan sang pagtamod ang ila nga reklamo.
Samtang suno naman kay Dumangas, Iloilo Mayor Ronaldo ‘Onal’ Golez, nakaatubangay na si Dillo kag ang developer sang NHA sa diin nahusayan na ini nga problema.
Sa interview sang Bombo Radyo kay Golez, iya ginpahayag nga posible wala gintuman sang developer ang pasalig kay Dillo.
Tungod sini, plano naman sang alkalde nga ipatawag ang duha ka kampo.
