Gin-gisa sang mga senador si Department of Health (DOH) Secretary Francisco Duque III sa Senate Blue Ribbon committe.
Ini ang kasunod sang pag-usisa sa ginapahayag ‘incompetence’ ukon wala sang kaathagan nga pag-manage sang DOH sa binilyon nga COVID-19 related response funds.
Nahibaluan nga una na ginkwestyon sang Commission on Audit (COA) ang masobra P67 billion nga paggamit sang nasambit nga ahensya sa COVID-19 funds.
Apang ginpanindugan ni Duque nga indi patas para sa ila ang report nga ginbalhag sang COA.
Kadungan sang pila ka mga pamangkot nga ginhaboy sang mga Senador angot diri, gin-ako ni Duque nga nagasalangisag na ang iya utok.
Gilayon naman ini nga ginpanugyanan ni Senador Richard “Dick” Gordon nga magpalantaw na sa psychiatrist.
‘’Maraming psychiatrist dyan sa DOH. Pagamot ka muna ng psychiatrists,’’ pahayag ni Gordon kay Duque.
‘’I know it is stressful to work in government. Please make sure to get it done,’’ dugang pa niya.
Gin-athag ni Gordon nga apisar abyan niya si Duque, yara sa gihapon sa pungsod ang iya loyalty.
‘’We are willing to help but God help those who help themselves,’’
Gin-ako man sang Senador nga tuman ang iya ka-dismaya sa DOH matapos ginapahayag wala gingamit sang insakto ang pondo halin sa gobyerno.
Nagakadapat kuntani suno kay Gordon nga ginhatagan importansya kag prayoridad sang DOH ang COVID-19 special risk allowance, pagkaon, akomodasyon kag allowance sang health workers nga naga-risgo sang ila kabuhi sa pag-atipan sang mga pasyente nga natapikan sang virus.
