Gulpyada nga pagpanagtag sang Aid to Individuals in Crisis Situation (AICS) sang Department of Social Welfare and Development (DSWD) sa kada banwa ang ginatudlo ni Iloilo Governor Arthur Defensor Jr. nga rason sa pagtimbuok sang COVID-19 cases sa Iloilo Province.
Ini man ang rason kun nga-a ginmando sang gobernador ang Barangay Quarantine tubtob Agusto 31, 2021 sa idalom sang Executive Order Number 320.
Sa interview sang Bombo Radyo kay Governor Defensor, iya ginpahayag nga sa idalom sang nasambit nga pagsulundan, hugot nga ipatuman ang border control sa kada barangay sa diin isa lang ka myembro sang puluy-an ang hatagan sang Quarantine Pass.
”Nagapangaman kita sa posible nga epekto sang mga gatherings sang nag-distribute kita sang financial assistance ukon ang AICS, kag ang posible nga epekto sang ka-dako dako nga kwarta amounting to P2.25 Billion. Nagasaka ang risgo sang COVID-19 kun magbutang ka sang amo na ka-dako nga kantidad sa bilog nga probinsya kag gulpi,”
Ginahingyo ang mga pumuluyo nga magpabilin sa sulod sang ila mga balay magluwas sa mga may trabaho ukon negosyo kag kun magbakal sang essential goods kag services.
Yari ang mga indibidwal nga ginakabig Authorized Persons Outside their Residences (APORs) nga ginapahanugutan sa pagbyahe ukon maggwa sa mga balay:
(a.) Health and emergency frontline services personnel kag uniformed personnel;
(b.) Government officials kag employees on official travel;
(c.) Duly authorized humanitarian assistance actors (HAAs), mga naga-transport sang medical supplies kag laboratory specimens related to COVID-19, kag iban pa nga relief and
humanitarian assistance;
(d.) Persons traveling para sa medical ukon humanitarian reasons kag mga pumuluyo nga magapabakuna batok sa COVID-19 (with proof of schedule)
Hugot man nga ginahingyo ni Defensor sa tanan nga local chief executive ukon Municipal Mayors ang istrikto nga pagpatuman sang sini nga mando.
”We are earnestly urging our Mayors, kay nagligad nga mga adlaw, tama gid ka gulpi sang aton pagsaka [COVID-19 cases],”
Gin-athag man sang gobernador nga katuyuan sini nga mas ginpahugtan lang ang pagsulundan sa idalom sang Modified Enhanced Community Quarantine status sa diin ginadumilian ang mass gathering kag ginalimitahan ang sirkulasyon sang mga tawo.
