Wala na sang dapat pamatud-an sa kalibutan si 8th Division World Champion Manny Pacquiao apisar napyerde sa ila hampang ni Cuban boxer Yordenis Ugas via unanimous decision sa T-Mobile Arena, Las Vegas, Nevada.
Ini ang kasunod man sang pagdayaw kag pagpanginbulahan nga ginbubo sang fans sa Pinoy Boxing Legend pagkatapos sang amo nga sambuwa.
Sa interview sang Bombo Radyo kay boxing analyst Edwin Espejo, iya ginpahayag nga posible nangin bitin ang stamina kag strength ni Pacquiao bangud masobra duha ka-tuig ini nga nagpahuway sa iya karera sa boxing.
Dako man ang posibilidad nga wala ni Pacquiao na-antisipar ang nangin fighting style ni Ugas sa diin bentaha ang malaba nga mga kamot sang Cuban fighter kag madasig ang pagbuya sini sang sumbag kag footwork.
Sa pihak sini, nagbubo ang suporta sang Filipino fans sa Pambansang Kamao — nga wala pa man nakapagwa sang iya official statement kun bala ini na ang katapusan niya nga sambuwa sa iya boxing career.
Nahibaluan nga nagaisahanon si Pacquiao nga eight-division world champion, may karera nga nagalawig na sang 26 ka tuig, nakaagi sa 71 ka professional matches, may 62 ka daug, kag nag-knockout sa 39 niya ka mga kasumpong.
