Nabuhinan ang mga Filipino para-athletes nga magahampang sa nagahilapit nga Tokyo Paralympics.
Ini matapos ginkumpirma ni Philippine Paralympic Committee president Mike Barredo nga isa sa anum ka atleta ang nagpositibo sa COVID-19.
Bangud sang 10-day quarantine ukon isolation nga protocol sang National Inter-Agency Task Force, indi na eligible ang amo nga para-athlete para sa Paralympics nga scheduled kuntani sa Agusto 24 tubtob sa Septyembre 5.
Ginpahayag man ni Barredo nga may officials kag coaches man nga kabahin kuntani sang Philippine delegation nga nagpositibo man sa virus.
“It is unfortunate for us to inform the public that some officials, coaches, and a para-athlete of our Philippine delegation bound for Tokyo to participate in the 2020 Tokyo Paralympic Games have tested positive for COVID-19,” kabahin sang statement ni Barredo.
Gin-athag sang natungdan nga ang mga nagpositibo sa virus ang indi kabahin sang Philippine Paralympic contingent nga nagbiya na sa pungsod kag nagpadulong sa Japan subong nga Domingo.
