Ginpa-Bombo sang pila ka mga Ilonggo Members kag Leaders sang New Beginnings Christian Fellowship Church sa Hong Kong ang ila Pastor kasunod sang ginapahayag pagpamuno sini sa ila Simbahan sang ‘investment scam’.
Ang Pastor amo si Rev. Danilo Borlado, Vice President sang Convention of Philippine Baptist Churches.
Sa interview sang Bombo Radyo kay Leah Huyo Armendez, nagatrabaho bilang Overseas Filipino Worker (OFW) sa Hongkong kag madugay na nga Leader sa nasambit nga Baptist Church, iya ginpahayag nga bangud dako ang pagsalig nila sa ila Pastor, na-engganyo sila sa pagpangganyat sini nga mag-invest sang kwarta nga ginapahayag maga-doble sa sulod sang isa lang ka bulan.
Suno kay Armendez, ginpasalig man sila nga wala sang hocus pocus ang amo nga investment apisar magpangutang pa sila sa bangko.
Ini bangud ginapahayag makapila na naka-pay-ot sang kwarta kag nakabakal sang salakyan ila Pastor kalakip na ang mga kabataan sini.
Bangud diri, nadesisyunan ni Armendez nga magpangutang sa bangko sang P90,000 kag gin-invest ini sa Pastor.
Pahayag niya, gin-ako man mismo ni Pastor Borlado nga may 10 percent ini nga kuhaon sa kada investment nga mabaton sini.
Apang ginapahayag nga tubtob subong, wala nakabaton si Armendez sang ginpasalig nga payout.
Isa man ka Ilonggo OFW sa Hongkong kag myembro sang New Beginnings Christian Fellowship Church nga nag-invest man sang dako nga kantidad kay Pastor Borlado ang nagpanawagan nga kuntani maghatag sang public apology sa pamunuan sang ila Simbahan bangud daw kaangay nga sila pa ang naga-gwa nga butigon matapos gin-kwestyon ang investment scheme nga ginhimo sa ila.
Sa interview sang Bombo Radyo kay Theresa Junsay, iya ginpahayag nga nagtuad na si Pastor Borlado nga nadula ang ila kwarta bangud napatay ang chief executive officer (CEO) sang investment company kun sa diin nagkadto ang ila kwarta apang wala man sang may ginpakita sa ila nga mga ebidensya kun ano ini ka matuod.
Ginapahayag man nga nagtanyag pa ang Pastor sang bag-o nga business investment agud ma-recover ang ila nga kwarta apang pilion lang sini ang mga hatagan sang payout.
Emosyonal nga nagpanawagan ang natungdan sa ila nga Pastor nga kuntani ma-konsensya man ini kag ibalik na an ila gin-invest nga kwarta bangud indi lango-lango ang ila pagpangabudlay para sa amo nga kantedad.
