Padayon nga ginahulat sang National Grid Corporation of the Philippines (NGCP) ang technical foreign experts nga magakaayo sang naguba nila nga high voltage submarine cable nga nagakonekta sa isla sang Cebu kag Panay.
Ang pagkaguba sang nasambit nga submarine cable ang gintunaan sang pagnubo sang power supply rason nga nagsaka ang presyo sang per kilowatt hour nga pass through generation charge sa mga konsumidor sang pila ka Electric Cooperatives sa Panay Island.
Sa interview sang Bombo Radyo kay Michelle Visera, Corporate Communications Officer sang NGCP, iya ginpahayag nga padayon ang ila pagpakig-angot sa Department of Foreign Affairs agud nga mapadasig ang pagsulod sa pungsod sang main contractors ukon technical foreign experts nga amo ang nagakadapat mag-assess sang naguba nga cable.
Suno kay Visera, sa tion nga matsikyar sang mga experto ang naguba nga kable sang kuryente, diri man matumod kun san-o matapos ang pagkaayo diri.
Sa subong, ginatinguhaan sang NGCP nga makapangita sang bakante nga submarine cable agud nga mahatagan sang solusyon ang nagataas nga presyo sang kuryente kag manipis nga power supply.
Matandaan nga ang nasambit nga high voltage submarine cable sang NGCP ang nasalapay kag naguba samtang nagapatigayon ang Department of Public Works and Highways (DPWH) sang dredging kag re-channeling sa Bio-os River sa Barangay Jagna, Amlan, Negros Oriental sang tinalikdan nga bulan sang Hunyo.
Padayon man nga ginapa-imbestigaran sang NGCP ang amo nga insidente.
