Nagpaathag ang More Electric and Power Corporation (MORE) Power kun ngaa nagsaka ang presyo sang kuryente sini nga bulan sang Agusto.
Sa interview sang Bombo Radyo kay Jonathan Cabrera, spokesperson sang MORE Power Iloilo, iya ginpahayag nga ang naguba nga 138kV submarine cable nga may 90 Megawatts (MW) capacity sang National Grid Corporation of the Philippines (NGCP), ang rason kun ngaa nagbuhin ang transmission capacity kag naapektuhan ang presyo sang kuryente.
Matandaan nga ang nasambit nga high voltage submarine cable sang NGCP ang nasalapay kag naguba samtang nagapatigayon ang Department of Public Works and Highways (DPWH) sang dredging kag re-channeling sa Bio-os River sa Barangay Jagna, Amlan, Negros Oriental.
Ini nga cable ang naga-interconnect sa tunga sang Negros kag Cebu Islands.
Bangud sini, nagsaka sa P1.53 per kilowatt hour ang pass through generation charge sa mga konsumidor sang MORE POWER Iloilo nga una na nagnubo sang tinalikdan nga bulan.
Suno kay Cabrera, apisar nagsaka sa P7.99 per kilowatt hour ang residential rate sa Iloilo City sini nga Agusto, makabig ini sa gihapon nga pinakamanubo kun ipaanggid sa iban nga mga Electric Cooperatives.
Sa subong, nagpangayo na sang bulig ang MORE Power Iloilo sa Energy Regulatory Commission agud mahatagan sang solusyon ang nagasaka nga line rental kag generation charges kasunod sang wala pa sa gihapon nakaayo nga pasilidad sang NGCP.
Nahibaluan nga nagsaka man ang rates ukon ang presyo sang kuryente sang iban pa nga Electric Cooperatives sa Panay Island.
