May mga barangay tanod na nga nagabantay sa Fort San Pedro, Iloilo City sa diin masami nga ginakadto-an sang mga tawo agud nga magpahangin-hangin sa kilid sang dagat.
Sa interview sang Bombo Radyo kay Punong Barangay John Eric David, iya ginpahayag nga sang ginpaidalom sa Modified Enhanced Community Quarantine (MECQ), nag-umpisa naman ang mga tawo nga maglagaw-lagaw.
Manami man kuntani nga ginakadto-an sang tawo ang Fort San Pedro apang sa subong nga may pandemya, ipa-iway lang anay ang pagtambay.
Suno kay David, gin-abisohan naman ang mga ambulant vendors nga indi magtinir sa nasambit nga lugar bangud isa ini sa nagaganyat sa mga tawo nga magtumpok ukon magtipon.
Naga-umpisa las 4 sang hapon ang mga tanod sa pagbantay sa mga nagatambay sa Fort San Pedro.
