Magluwas nga nagaguwa na ang kakulitan, makahangop naman sang apat ka mga lenggwahe nga English, Filipino, Spanish kag French ang anak nanday Solenn Heussaff kag Nico Bolzico nga si Baby Thylane.
Ginpahayag ni Solenn nga personal nga desisyon niya nga indi anay magbaton sang mga acting project nga may lock-in taping.
Masako ang aktres sa subong bilang full-time mom kag naka-focus siya sa anak humalin sa pagluto, baking kag pagpinta.
Suno kay Solenn, kun updanay sila ni Baby Thylane, lunsay French ang iya ginagamit sa pagpakig-istorya samtang Spanish naman kun si Nico ang upod sang ila anak.
Kun kaupod naman sang bata ang iloy ni Solenn kag iban nga mga himata nila, English kag Filipino ang ginagamit sa pagpakig-istorya kay Baby Thylane.
