Target sang Barangay Boulevard, Molo, Iloilo City nga makabakuna sang indi magnubo sa 200 ka mga indibidwal kadungan sang patigayunon nga barangay-based vaccination umpisa bwas, Agosto 30.
Sa interview sang Bombo Radyo kay Punong Barangay Virgilio Villanueva, iya ginpahayag nga pagahiwaton ang vaccination rollout sa barangay gym apang may yara man sang magakadto sa tagsa ka balay agud nga magbakuna sa mga bedridden ukon ang mga nabudlayan maglakat.
Suno kay Villanueva, may yara sang masobra 7,000 ka mga pumuluyo ang naga-istar sa Boulevard kag target nga mabakunahan sang barangay ang 5,000 ka mga indibidwal.
Samtang nahitso na sang Barangay Caingin, La Paz, Iloilo City ang ila nga gym nga pagahiwatan sang vaccination rollout nga natalana naman sa Agosto 31.
Suno kay Kagawad Bendol Labanero, indi lang niya mapat-od kun bala nanari-sari nga vaccine brands ang dal-on sang mga magabakuna sa mga pumuluyo bangud indi manigar nga may yara sa gihapon sang pisli-an.
Sa subong, 60% na sa populasyon sang nasambit nga barangay ang nabakunahan batuk sa COVID-19.
Na-abisohan na ni Punong Barangay Pascual “Sipil” Espinosa sang San Juan, Molo, Iloilo City ang mga opisayal lakip na ang mga tanod sa pagsiguro nga masunod ang public health protocols kadungan sang barangay-based vaccination rollout.
Sa interview sang Bombo Radyo kay Espinosa, iya ginpahayag nga may mga tikang na sila nga gina-ubra agud nga mangin mahapos ang sistema sa pagpangbakuna.
May yara sang apat ka mga border sa San Juan, sa diin lunsay pagabantayan ini sang mga barangay tanod kag isa lamang ang alagyan sang ‘entrance’,
Target sang San Juan, Molo, nga mabakunahan na ang kapin 7,000 ka mga indibidwal sa nasambit nga barangay.
