ILOILO CITY- Posible nga mag-resume na ang voters registration sa Comission on Elections (COMELEC) Iloilo City apisar nga nakapaidalom pa sa Modified Enhanced Community Quarantine (MECQ) ang syudad.
Sa interview sang Bombo Radyo kay COMELEC Region 6 Director Atty. Wilfred Jay Balisado, iya ginpahayag nga kaangay nga nagakauyang na ang tiempo para sa voters registration ilabi na sa mg lugar nga napaidalom sa Enhanced Community Quarantine (ECQ) kag MECQ.
Nahibaluan nga santo sa guidelines,sirado ang opisina sang COMELEC sa mga lugar nga nakapaidalom sa nasambit nga quarantine status.
Suno kay Atty. Balisado, mahimo nga sa masunod nga mga inadlaw, magapagwa ang COMELEC en banc sang bag-o nga polisa agud nga mapadayon na ang voters registration.
Pahayag sang regional director, sa tion nga tugutan na sila nga magpadayon sang voters registration, 11 ka oras ang ila operasyon, humalin alas-otso sa aga tubtob alas-siete sa gab-i, wala sang noon break, wala sang holiday, kag may yara man sang Saturday registration.
Dugang niya nga sa subong, may walo na ka machines ang Iloilo City COMELEC para sa mas madasig nga registration.
Matandaan nga May 24,2021 ang ulihi nga registration sa Iloilo City antes ini gin-suspend.
Una na nga gin-anunsiyo sang COMELEC nga magapadayon na ang voters registration sa bilog nga pungsod umpisa buas, Septyembre 1.
