ILOILO CITY- Ginbasol sang Iloilo City Treasurer’s Office ang mabaskog nga ulan kon ngaa indi suportado sang dokumento ang payments sa pila ka mga benepisyaryo sang Cash for Work Program sa syudad.
Ini may kaangtanan sa pinakaulihi nga Commission on Audit (COA) Annual Audit Report sa diin nakit-an nga may yara sang makaduluda sa P12.313 million payments sa 4,817 beneficiaries para sa COVID-19 Cash for Work Program bangod indi suportado sang kompleto nga documentation.
Sandig sa COA report, may yara sang 64 ka mga benepisyaryo nga nakabaton sang kabilugan nga P174,600 apang wala sang nagakaigo nga papeles kon sa diin may yara lang sang apat tanan ka accountable officers ang nagserbe nga representative kag amo ang nagkuha sang kwarta para sa nasambit nga mga benepisyaryo.
Ang apat ka accountable officers amo sanday:
1.Juliet Apsay nga nagkuha sang P69,200 para sa 26 ka beneficiaries
2.Maria Lody Celestial nga nagkuha sang P42,500 para sa 17 ka beneficiaries
3.Lorly Sucgang nga nagkuha sang P53,300 para sa 18 ka beneficiaries
4.Leo Cañonero nga nagkuha sang 9,600 para sa tatlo ka beneficiaries
Antes ginpagwa ang amo nga report, ginpangayuan sang COA sang paathag ang City Treasurer’s Office kag santo sa reply sang opisina, nagkalabasa kag severely damaged ang ginatumod nga mga dokumento nga nagalakip sang authorization letter nga ginhatag sang 64 ka mga benepisaryo sa apat ka accountable officers.
Sa subong, wala pa sang paathag si Iloilo City Treasurer Jinny Hermano may kaangtanan sa amo nga COA findings.
