Posible nga mahatag na sa ika-duha nga semana sini nga bulan sang Septyembre ang sweldo sang mga driver kag transport cooperatives nga yara sa idalom sa service contracting program sang Land Transportation Franchising and Regulatory Board (LTFRB).
Nahibaluan nga nagtakop lang ang nasambit nga programa sang LTFRB sang Hunyo 30, apang tubtob subong, nagawangal sa gihapon ang mga driver bangud wala pa sang may nabaton nga sweldo.
Sa exclusive interview sang Bombo Radyo kay Mr. Rizalito Alido, Board Secretary sang Iloilo City Alliance of Operators and Drivers Transport Cooperative (ICAODTC), iya ginpahayag nga nagpasalig na ang LTFRB nga aprubado na sang Department of Budget and Management (DBM) ang tanan nga sweldo sang drivers.
Inug-transfer na lang suno sa iya ang tanan nga payroll sa bank accounts.
Suno kay Alido, ginpat-od man sa ila sang LTFRB nga pang-uboson sila bayaran sini nga bulan bag-o ipatuman ang gina-propose naman sang ahensya nga Libre Sakay program.
Apang gin-ako sang natungdan nga kun maliwat man lang ang problema sa tuman ka delay nga pag-release sang sweldo, indi na sila magpasugot nga makigbahin pa sa service contracting sang LTFRB.
Nahibaluan nga may yara sang P5.58 billion budget ang Department of Transportation sa idalom sang Bayanihan 2 nga ginpain para sa Libre Sakay program.
