Nag-atras sa pagpabakuna batok sa COVID-19 ang pila ka mga pumuluyo sang Barangay Bakhaw, Mandurriao, Iloilo City matapos natukiban nga Sinovac ang brand sang bakuna nga itublok sa ginpatigayon nga barangay based vaccination.
Sa interview sang Bombo Radyo kay Punong Barangay Joel Alvarado, iya ginpahayag nga sa 339 nga target vaccinees, 270 na lang ang numero sang mga nabakunahan.
Suno sa opisyal, magluwas sa mga nagapili sang brand sang bakuna, may mga pumuluyo man nga ginrekomenda sang doktor nga indi anay magpa-vaccine bangud mataas ang ila blood pressure sa diin ang iban naman ang may yara sang balatian nga allergy.
Apang sa pihak sini nagapasalamat man si Alvarado bangud mas madamo sa gihapon ang na-engganyo nga magpabakuna sa diin nalab-ot man sang vaccinators ang mga bedridden sa ginpatigayon nga house-to-house vaccination.
