ILOILO CITY- Nabaton na sang first Pinay boxer nga nag-qualify sa Tokyo 2020 Olympics nga si Irish Magno ang cash incentive nga ginhatag sang Iloilo Provincial Government.
Sa interview sang Bombo Radyo kay Magno nga tumandok sang Janiuay, Iloilo, iya ginpahayag nga dako nga butang ang nabaton niya nga P300K cash agud mapakay-o niya ang ila balay.
Suno kay Magno, dako ang iya pagpasalamat bangud apisar wala ini sang nakuha nga medalya sa Olympiada, ginkilala kag ginakabig sa gihapon sang mga Ilonggo nga kadalag-an ang iya paghampang sa Olympics.
Sa subong, plano ni Magno nga magbalik sa training para sa masunod pa nga mga kompetisyon.
Suno sa iya, indi siya mag-untat tubtob indi niya makuha ang gold medal sa Olympics.
Nagpangabay man ini sang suporta para sa masunod pa niya nga mga away.
