ILOILO CITY- Kaangay nga gintiltig man sang pandemya ang palangabuhian sang mga manugtiltig sang lapida ukon lapida engravers.
Sa interview sang Bombo Radyo kay Basil Jualan, residente sang Brgy. Golgota, Janiuay, Iloilo kag masobra isa ka dekada na sa amo nga trabaho, iya ginpahayag nga tuman ka pigado ang ila kita subong bangud sa pandemya kon sa diin 60% gid sang ila regular nga kita sadto ang nadula subong.
Suno kay Jualan, malaka na lang ang nagapaubra sang lapida bangud man sa kapigaduhon gani ginapili na lang sang mga himata sang napatay nga indi na magpahimo sang lapida.
Dugang pa niya, isa pa ka rason amo nga gina- cremate na lang ang nagakapatay sa COVID-19 kag ginasulod na lang sa urn ang abo, magluwas pa sa tuman ka mahal man nga balaydan sa pagpa-cremate gani ang iban, wala na lang nagapahimo sang lapida para sa ila minatay nga ginalubong.
