Ginpangayuan sang paathag sang Commission on Audit (COA) ang kapin P500,000 nga unliquidated expenses sang Barangay San Isidro, Jaro Iloilo City.
Sa interview sang Bombo Radyo kay Punong Barangay Felix Doreza, iya ginpahayag nga ang nasambit nga pondo ang nagkadto tanan sa food items kag iban pa nga COVID-19 supplies para sa ila barangay.
Suno kay Doreza, ”documented” naman ang tanan nga ginkadtuan sang kwarta apang napaslawan lang sila nga mapasa dayon ang liquidation sa COA bangud man sa madamo nila nga hilikuton sa barangay tuga sang COVID-19 pandemic.
Pahayag sang opisyal, nangin masako man sila sa pagtutok sa pagpanagtag sang Assistance to Individuals in Crisis Situation (AICS) sang Department of Social Welfare and Development (DSWD).
Sa pihak sini, ginpat-od ni Doreza nga sa sini nga semana, posible mapasa na nila ang liquidation nga gina-require sang COA.
