Napasakaan na sang reklamo sang Iloilo City Government sa Iloilo City Prosecutor’s Office ang tatlo ka mga matag-as nga opisyal sang Philippine Health Insurance Corporation (PhilHealth) Region VI.
Ang mga ginpasakaan sang reklamo amo sanday:
- PhilHealth Regional Office Head Atty. Valerie Anne Hollero;
- Health Care Delivery Management Division Head Marjorie Cabrieto; kag
- MS III, Officer in Charge Dr. Genaline Aguirre
Ini ang kasunod man sang kapaslawan sang PhilHealth Region VI nga makabayad sang kapin P932.3 Million nga unpaid hospital claims kalakip na sa USWAG Molecular laboratory sang syudad.
Sa nasambit nga kantidad, kapin P 88.1 Million ang utang sang ahensya sa The Medical City Iloilo, P49.9 Million sa West Visayas State University Medical Center, P190. 7 Million sa Metro Iloilo Hospital and Medical Center, P30.3 Million sa QualiMed Hospital, P58.1 Million sa Iloilo Doctor’s Hospital, P95.2 Million sa St. Paul’s Hospital Iloilo, P112.7 Million sa Western Visayas Medical Center, P99.6 Million sa Iloilo Mission Hospital, kag kapin P 207.4 Million sa USWAG Molecular Laboratory.
Una na ginpahayag ni Iloilo City Mayor Jerry Treñas sa interview sang Bombo Radyo nga ang indi pagbayad sang PhilHealth sa nasambit nga claims ang magaresulta sa kapaslawan sang medical institutions sa syudad nga mag-provide sang medical needs sang pumuluyo ilabi na sa tunga sang nagapadayon nga COVID-19 pandemic.
Ang ginpasaka nga mga reklamo amo ang may kaangtanan sa paglapas sang ahensya sa Republic Act No. 3019 ukon ang ANTI-GRAFT AND CORRUPT PRACTICES ACT, kag Republic Act No. 11032 ukon ”Ease of Doing Business and Efficient Government Service Delivery Act of 2018”.
Ang pormal nga reklamo sang syudad ang ginpadala man kanday Deputy Ombudsman Paul Elmer Clemente sang Office of the Deputy Ombudsman for the Visayas, kag Anti-Red Tape Authority Director General Secretrary Jeremiah Belgica.
