Indi na magpadalagan para sa re-election bilang party leader ang prime minister sang Japan nga si Yoshihide Suga.
Ini nga anunsyo ang nagapatimaan man sang pagtakop na sang iya nga termino.
Nahibaluan nga si prime minister Suga ang nagtal-os kay Shinzo Abe sang nagligad nga tuig.
Suno kay Bombo International Samurai Correspondent Josel Palma direkta sa Japan, ang anunsyo nga ginkakibot sang kadam-an ang kasunod sang pagsarurot sang approval ratings ni Suga sa ”all-time low.”
Pahayag ni Palma, santo sa pahayag sang secretary general sang Liberal Democratic Party (LDP) ni Suga, luyag na lang sang prime minister nga tutukan ang anti-coronavirus measures ukon ang pagtapna sa lapnagon nga COVID-19 pandemic kag indi na magpadalagan pa sa leadership election.
Ang nasambit nga ruling party ang natalana naman nga magpatigayon sang eleksyon sa palaabuton nga Septyembre 29 para sa iga-appoint nga presidente.
Ang magadaog sa leadership election amo man ang mangin lider sang pungsod Japan bangud ginakabig nga parliamentary majority ang Liberal Democratic Party.
Nahibaluan nga yara sa gihapon sa idalom sang ‘state of emergency’ ang nasambit nga pungsod bangud sa padayon nga pagtimbuok sang COVID-19 cases.
Sa subong, masobra na sa 1.5 million ang kaso sang virus sa Japan.
Apang sa pihak sang nagalala nga sitwasyon, wala napunggan ang pag-host sang pungsod sa Olympic Games sini nga tuig.
