Matapos ang anom ka bulan, ipasa na sang National Bureau of Investigation (NBI) ang resulta sang imbestigasyon sa Department of Justice (DOJ) may kaangtanan sa engkwentro sa tunga sang Philippine National Police (PNP) kag Philippine Drug Enforcement Agency (PDEA) nga ginkapatay sang apat ka tawo sang Pebrero 24.
Nakatipon ang NBI sang 22,000 pages sang digital evidence agud nga ma-angot ang serye sang natabo ang shootout.
Suno kay NBI-National Capital Region regional director Cesar Bacani, nakakita ang ahensya sang text nagikan sa isa sa mga cellphones sang PDEA agents sa diin naguwa nga inconsistent ini sa ila nga statement nga ang asset amo ang nag set up sang buy bust operation nga dala ang 300 grams sang shabu.
Sa bahin naman sang Quezon City Police District (QCPD), ang cellphone sang ila nga asset nga si Jonaire Decena, isa ka detainee, ang nagapakita nga gin-contact siya ni Renato Peña, ang nagpakuno-kuno bilang Chinese.
Sa isa nila ka video calls, ginpakita pa ni Decena ang kwarta nga gamiton niya sa pagbakal sang shabu kay Peña.
Ang wala nahibaluan ni Decena, nga isa man gali ka detainee si Peña sa Sablayan Penal Colony.
Dugang pa sang NBI, si Decena ang may yara sang dala nga dako nga kantidad sang kwarta antes natabo ang shootout.
Sa rekomendasyon sang NBI, apat ka mga PDEA agents kag isa ka pulis ang ginapakasuhan sang homicide.
Walo naman ka pulis sang District’s Special Operations Unit (DSOU) kag isa ka PDEA agent ang ginapakasuhan sang attempted homicide.
Samtang kaso nga paglapas naman sa revised penal code kag Anti-Graft and Corrupt Practices Act ang ipasaka sa hepe sang QCPD-DSOU kag tatlo ka iban pa nga DSOU officials.
