ILOILO CITY- Natumod na sang Estancia Municipal Police Station ang identity sang suspek nga nagluthang- patay sa isa ka lalaki sa Purok 3, Brgy. Lonoy, Estancia, Iloilo.
Ang biktima amo si Bryan Alkonga, 36 anyos, tumandok sang Batad, Iloilo samtang ang suspek naman amo si Rigor Libo kag pakaisa sang live-in partner sang biktima.
Sa interview sang Bombo Radyo kay PLt. Joebert Amado, hepe sang Estancia PNP, iya ginpahayag nga naga-istar ang biktima sa balay sang iya live in partner kon sa diin man nagatinir ang suspek.
Ang live- in partner sang biktima ang yara nagatrabaho sa luwas sang pungsod samtang ang ila mga kabataan ang naga-istar sa iya nga ugangan.
Pahayag ni Amado, ang biktima man ang nagasustiner sa kinahanglanon sang suspek samtang nagaistar ini upod sa ila kag nakamuno ini sa pamilya sang iya live in partner nga indi ini komportable sa presensya ni Libo bangud kaangay nga nagasalig na lang ini sa ila.
Matapos ang krimen, madasig nga nangin dulaan ang suspek kag nagapabilin nga at-large tubtob subong.
