Gin-evacuate ang ginatos ka mga menor-de-edad kag kabataan nga wala sang bantay ukon upod nga ginikanan sa Afghanistan.
Nahibaluan nga umpisa sang ginsakop sang Taliban militants ang nasambit nga pungsod, madamo sang mga kabataan ang na-separar sa ila pamilya kasunod sang pagkinagual sang kadam-an agud makapadulong sa Kabul airport antes ang withdrawal sang US forces sa katapusan sang Agusto.
Suno sa United Nations International Children’s Emergency Fund chief Henrietta Fore, kapin 300 ka mga kabataan nga wala sang upod nga ginikanan ang na-evacuate humalin sang Agusto 14.
Nagapadayon pa suno kay Fore ang ila nga evacuation operations rason nga ginalauman nga madugangan pa ang numero sang mga kabataan nga makuha sa Afghanistan.
Matandaan nga bag-o ang withdrawal sang Estados Unidos sa Afghanistan, masobra 123,000 ka mga indibidwal ang na-evacuate sang US troops halin sa Kabul airport sa diin lakip na diri ang mga US citizens, interpreters, mga nagasuporta sa US mission kag mga indibidwal nga kwalipikado para sa special visa agud makasaylo sa iban nga pungsod.
