ILOILO CITY- Isa ka magpamilya nga Ilonggo Chinese millionaire ang ginpasakaan sang reklamo sang More Electric and Power Corporation ukon MORE Power bangud sa pag- tamper sang ila electric meter.
Sa interview sang Bombo Radyo kay Atty. Hector Teodosio, legal counsel sang MORE Power, iya ginpahayag nga Hulyo 2020 sang na- apprehend sa compound sang mag-ululutod nga sanday Mary Tiu, Edward Tiu, Rodolfo Tiu, Eugene Tiu, Edgar Tiu kag asawa nga si Caroline Tiu sa Rosario Subdivision, Molo, Iloilo City ang tampered nga electric meter kag transformers.
Suno kay Atty. Teodosio, sa analysis sang MORE Power, 50% lang sang ila total bill sang kuryente ang ginabayaran sang mag-ululutod sa diin ang kada isa sa ila ang may yara sang metrohan.
Ginpahayag man ni Teodosio nga nag-angkon ang MORE Power sang kapierdehan nga kapin sa P100,000 bangud sa tampered meter.
Enero 2021 sang nag-file ang MORE Power sang reklamo batok sa anom ka Chinese millionaires para sa paglapas sang RA 7832 ukon ang ‘Illegal Use of Electricity and Theft of Power.’
Suno sa natungdan, sa ginpatigayon nga preliminary investigation sa Office of the City Prosecutor, ginrekomendar ang pagpasaka sang kaso nga paglapas sang RA 7832 batok sa mag-ululutod.
Nahibaluan nga ang pamilya Tiu amo ang nagapanag-iya sang pinakadako nga appliance center sa Iloilo kag tag-iya man sang pila ka establishments kag hotel sa syudad.
Kun mapamatud-an nga guilty, sila ang mahimo nga magpangatubang sang penalidad nga anom tubtob 12 ka tuig nga pagkapreso kag multa nga P10,000.
Gindugang man sang abugado nga hugot nga ginpanginwala sang mga respondents ang panumbungon batok sa ila.
***SABAT SANG TIU SIBLINGS***
Handa nga mag-atubang sa korte ang mag-ululutod nga Ilonggo Chinese millionaires matapos nga ginpasakaan sang reklamo sang More Electric and Power Corporation ukon MORE Power bangud sa ginaalegar pag-tamper sang ila electric meter.
Sa interview sang Bombo Radyo kay Atty. Nelson Oberas, legal counsel sang pamilya Tiu, iya ginpahayag nga nagapanindugan ang kampo sang mga respondents nga wala nag- agi sa husto nga proseso ang nangin tikang sang MORE Power nga nagresulta sa rekomendasyon nga pagpasaka sang kaso sa ila angot sa paglapas sa RA 7832 ukon ang ‘Illegal Use of Electricity and Theft of Power.’
Suno kay Atty. Oberas, kwestiyonable ang ginhimo nga pagbukas sang mga personnel sang MORE Power sang meter boxes sang mag-utod nga Tiu bangud base sa layi, kinahanglan nga may presensya sang barangay official, representative sang Energy Regulatory Board, ukon katapo sang Philippine National Police, apang sang amo nga tion, wala sang presensya sang bisan isa sa mga ini.
Ini magluwas pa nga wala man ginpahibalo sang mga personnel ang mga respondents tuhoy sa pag-inspect sa ila meter boxes.
Dugang pa niya, isa ka personnel sang MORE Power ang nanindugan nga yara sang amo nga tion ang isa sa mga respondents kag nakuhaan pa nila ini sang laragway apang sang gin-check ni Oberas ang amo nga letrato, indi man ini ang ginatumod nga myembro sang pamilya Tiu.
Sa subong suno sa abogado, nakapadala na ini sang petition for review sa Department of Justice sa kaso ni Rodolfo Tiu kag may yara man sang pending nga motion for reconsideration sa Prosecutor’s Office para sa iban pa nga myembro sang pamilya Tiu bangud ginapanindugan sang ila kampo nga wala sang bastante nga basehan ang reklamo sang MORE Power.
Gin-ako naman niya nga ginbayaran na nila ang amount nga ginplastar sang MORE Power nga ila napierde nga kapin P100,000 apang gin-athag niya nga isa ini ka payment under protest kag wala nagakahulugan nga nagaako sila sa akusasyon batok sa ila.
Dugang pa sang kampo sang mag-ululutod,ang ila connection ang panahon pa nga ang Panay Electric Company ang electric distribution utility sa Iloilo City kag yara lang sa gwa sang compound ang ila metrohan kag wala sang rason nga ila ini i-tamper.
