ILOILO CITY- Wala sang malain nga epekto sa mga tawo nga may cardiovascular conditions ang pagpabakuna batok sa COVID-19.
Sa interview sang Bombo Radyo kay Dr. James Catoto, isa ka Adult and Interventional Cardiologist, iya ginpahayag nga safe ang COVID-19 vaccine para sa mga tawo nga may ginabatyag nga balatian kaangay sang stroke ukon heart attack kag iban pa.
Suno kay Catoto, ang tawo nga may yara sang kasubong nga kondisyon ang may mataas nga risgo nga magsuprir sang malala nga sintomas kun ma-infect sang COVID-19 kag ang pagpabakuna ang magaserbe nga proteksyon agud nga malikawan ang severe symptoms.
Sa bahin naman sang side effects sang pagpabakuna, ginpahayag sang doktor nga masami maeksperyensiyahan ang inflammation sa injection site, hilanat, ukon pagpalanakit sang lawas.
Apang paathag sang doktor, madasig lang nga madula ini kag indi ini delikado.
Sa mga tawo naman nga luyag magtumar sang bulong agud makuha ang sakit nga ila ginabatyag, safe ang pagtumar sang paracetamol.
