Magalawig sang 12 ka oras ang scheduled brown-out sa Iloilo City kag Leganes, Iloilo sa Domingo, Septyembre 12, 2021.
Sa interview sang Bombo Radyo kay Michelle Visera, Corporate Communications Officer sang National Grid Corporation of the Philippines (NGCP), iya ginpahayag nga magaumpisa sa alas-sais sa aga tubtob alas-sais sa gab-i ang brown-out bangud sa patigayunon nga preventive maintenance.
Suno kay Visera, apektado diri ang More Electric and Power Corporation (More Power) kag Iloilo Electric Cooperative ukon ILECO 1.
Sa bahin sang More Power, apektado ang substations sa Jaro kag Mandurriao, Iloilo City, kag Mobile Substations.
Sa bahin sang ILECO -1, apektado ang Leganes substation, Barangay Agusipan, Sta. Barbara, Iloilo kag bilog nga franchise area sang Guimaras Electric Cooperative (GUIMELCO).
Ginpahayag sang natungdan nga ang nasambit nga preventive maintenance ang nagatuyo nga makaayo ang Sta.Barbara-Ingore 69kV line kag malikawan ang mga unscheduled power interruptions sa palaabuton.
Nagpangayo man sang paghangop si Visera sa publiko.
