Natalana nga pasakaan sang kaso nga murder ang duha ka mga natumod nga suspek nga nagbuno- patay kag naglaslas sang puwak sang 16- anyos nga solterito sa Sitio Cubay, Brgy. Alabidhan, Bingawan, Iloilo.
Ang biktima amo si Ian Adorable sang Poblacion, Bingawan, Iloilo.
Sa interview sang Bombo Radyo kay Police Lt. Martin Pugales, hepe sang Bingawan Municipal Police Station, iya ginpahayag nga ang ginatudlo mga suspek sa krimen ang nagaedad 10 kag 19 anyos.
Pakaisa sang 13 anyos nga dalagita nga ginapahayag ginhimuslan ni Adorable sang bulan sang Mayo ang 10 ka-tuig nga suspek kag magulang naman sini ang 19 anyos.
Suno kay Pugales, posible nga tuman ka dako ang kaakig sang mga suspek sa biktima bangud tuman man ka brutal ang krimen nga ila ginkomiter.
Sa subong nagapadayon ang pagpangita sang mga pulis sang dugang nga witness.
Nagpanawagan man si Pugales sa mga suspek nga magsungka ilabi na nga menor de edad ang isa sa ila.
