Gingisa sa hearing sa Senate Blue Ribbon Committee ang Chinese businessman nga anay presidential economic adviser nga si Michael Yang bangud sa ginaalegar kaangtanan sini sa iligal nga droga.
Sa hearing, ginpresentar sang chairman nga si Senator Richard Gordon ang pila ka mga pictures ni Yang kaupod si certain Allan Lim.
Si Allan Lim ang pareho lang nga tawo nga nagapakilala bilang si Lin Wei Xiong kag Wen Li Chen.
Una nga ginpakita sang senador ang picture ni Yang kaupod si Presidente Rodrigo Duterte sang 2017.
Sa kaangay nga footage, si Yang kag si Duterte ang kaupod ni Allan Lim.
Ginpakita man ni Gordon ang dugang nga picture ni Duterte kaupod si Yang kag Lim — ang nasambit nga picture ang nakuha nagikan sa isa ka news report.
Ginpanginwala naman ni Yang nga kilala niya si Allan Lim apang suno sa iya, kilala niya ang lalaki sa mga pictures sa pangalan nga Lin Wei Xiong.
Tuig 2013 pa sang iya ini nakilala.
Ginpresentar pa gid ni Gordon ang dokumento nga nagapakita nga si Allan Lim ukon si Wen Lin Chen kag Lin Wei Xiong ang kilala nga drug personality.
Santu sa dokumento, si Allan Lim ang konektado sa Wen Li Chen Drug Trafficking Syndicate.
Siya ang ginaalegar may kaangtanan sa pag-finance kag pag-facilitate sang importasyon, transhipment kag local distribution sang imported nga shabu kag laboratory equipment.
Suno kay Yang, wala siya nakahibalo sang mga drug allegations batuk kay Allan Lim.
Wala man niya ginkumpirma nga ang nakilala niya nga si Lin Wei Xiong ang isa lang ka tawo nga yara sa picture nga attached sa initial profile sang drug personality.
