Nagpanawagan ang pamunuan sang Ungka Transportation Operators Drivers Association (UTODA) sa Iloilo City Alliance of Operators and Drivers Transport Cooperative (ICAODTC) nga pangsawayon ang mga Provincial Jeepneys kag mga modernized nga mini bus nga wala naga-unload sang pasahero sa ITGSI Ungka Terminal.
Sa interview sang Bombo Radyo kay Francis Pueda, presidente sang UTODA, iya ginpahayag nga humalin sang Marso, sa duha ka mall sa Pavia, Iloilo ginadrop sang Provincial Jeepneys ang mga pasahero.
Bangud sini, sa mga modenized mini-bus na lang nagasakay ang mga pasahero.
Suno kay Pueda, maathag ini nga pagbalewala sa Perimeter Boundary Ordinance agreement kag madugay naman nila ini nga ginreklamo sa Iloilo City Government.
Bangud man sini suno sa iya, tuman ka apektado ang kinitaan sang traditional Public Utility Jeepneys (PUJs) nga nagahulat sa Provincial Jeepneys nga mag-unload sang mga pasahero sa ITGSI Terminal ukon Perimeter Boundary Terminal.
Nagakadapat suno sa iya nga mahatagan sang penalidad ang mga driver nga wala nagasunod sa ila franchise route.
Depensa naman sang pamunuan sang Iloilo City Alliance of Operators and Drivers Transport Cooperative (ICAODTC), may verbal agreement sa tunga nila sang Land Transportation Franchising and Regulatory Board (LTFRB) nga pahanugutan na lang ang mga driver nga mag-unload sang pasahero sa duha ka mall sa Pavia, Iloilo.
Sa exclusive interview sang Bombo Radyo kay Mr. Rizalito Alido, Board Secretary sang Iloilo City Alliance of Operators and Drivers Transport Cooperative (ICAODTC), iya ginpahayag nga bangud sa COVID-19 pandemic kun sa diin apektado man ang kita sang mga Modernized jeepney, ginpasugtan na lang sang LTFRB nga sa duha ka mall sa Pavia sila maghulat sang pasahero kun sa diin madamo sang tawo.
Suno kay Alido, nagakadapat nga sa LTFRB nalang magdiritso reklamo ang Ungka Transportation Operators Drivers Association (UTODA).
Kun ano mando suno sa natungdan sang LTFRB, pat-od nga magasunod man sila.
