Wala sang may na-monitor nga problema ukon nabaton nga reklamo halin sa ginikanan kag learners ang Department of Education (DepEd) Region VI kadungan sang pagbukas sang klase subong nga adlaw, Septyembre 13, 2021.
Sa interview sang Bombo Radyo kay Mr. Hernani Escullar Jr., spokesperson sang DepEd Region VI, iya ginpahayag nga padayon ang blended learning system sang mga kabataan kun sa diin pabor sa pagpatigayon sang online class ang iban nga may maayo nga internet connection samtang ang iban naman ang mas pabor sa modular learning method.
Suno kay Escullar, base sa ila Basic Education Learning Continuity Plan, gintun-an nila sang ma-id-id ang mga pamaagi nga indi makompromiso ang pagtuon sang mga estudyante sa tunga sang COVID-19 pandemic.
Padayon man ang assessment sang DepEd agud mapasangkad pa ang pagtuon sang learners.
Sa pihak sini, nagapadayon man ang pagbaton sang ahensya sang enrollees subong nga adlaw, Septyembre 13 sa diin magalawig ini tubtob Septyembre 30.
