Nakadepende sa kalidad sang panan-awan kag paminsaron sang isa ka indibidwal ang iya pag-angkon sang kalidad man nga kabuhi.
Sa interview sang Bombo Radyo kay Francis Ray Subong, Registered Guidance Counselor kag Public Relations Officer sang Philippine Guidance and Counseling Association, iya ginpahayag nga sa tunga sang nagapadayon nga pandemya, nagakadapat nga marealisar sang tanan nga ang isa kag isa ang may ginabitbit nga kapait.
Ini man ang rason suno sa iya nga nagakadapat indi lang mangin mabuot ang isa ka indibidwal sa iya abyan kundi mangin man sa iya kaugalingon.
Suno kay Subong, naga-reflect sa kabuhi sang tawo ang kun ano man ang ginapasulod niya sa iya huna-huna rason nga tuman ka importante ang paghatag sang prayoridad sa mental health pinaagi sa pagpahuway sa insakto nga oras kag pag-adjust sa mga indi kontrolado nga sitwasyon.
Nagapati naman ang isa ka integrative healing advocate nga ang pagsalig sa mahal nga makaako ang isa sa mga liyabe agud mangin emotionally stable kag malikawan ang fatigue ukon stress tuga sang pandemya.
Sa interview sang Bombo Radyo kay Engineer Nilo Jardeleza, iya ginpahayag nga sa tion nga indi estable ang emosyonal nga aspeto sa kabuhi sang isa ka indibidwal, pat-od nga apektado man ang focus sini lakip na ang intellectual stability.
Ini man ang nagaresulta suno sa iya sa depresyon kag anxiety.
Suno kay Jardeleza, ini man ang rason kun ngaa tuman ka importante ang pagtumod sa ginabitbit nga emosyon ukon kabug-at agud mahatagan ini sang nagakaigo nga igtalupangod kag solusyon.
Indi man bastante pahayag sang natungdan ang pagdepende sa kinaiya nga ikasarang rason nga nagakadapat may pagtuo ang isa ka indibidwal agud may masindigan ini sang kabug-at nga iya ginabitbit.
