Gina-promote kag gina-engganyo sa gihapon sang isa ka health expert ang publiko nga magpabakuna batok sa COVID-19 apisar na-eksperyensyahan niya ang tumalagsahon nga adverse event following immunization.
Sa interview sang Bombo Radyo kay Dr. Ludovico Jurao, infectious disease specialist sa Iloilo Doctors’ Hospital, iya ginpahayag nga sang nag-abot ang suplay sang bakuna sa Western Visayas sang Marso, 2021, siya ang pinakauna nga doktor nga ginbakunahan sa nasambit nga ospital.
Apang malas lang suno sa iya bangud siya man ang gin-igo sang side effect ukon adverse event following immunization.
Suno kay Dr. Jurao, bangud may yara siya sang comorbidities ukon nanuhay-tuhay nga balatian, gin-igo siya sang balatian nga stroke matapos nakabaton sang bakuna.
Dako man nga risgo suno sa doktor ang nangin tikang niya sa pagpabakuna, kag sa pihak sang natabo sa iya, ginakabig niya sa gihapon ang kaugalingon nga ‘pro vaccine.’
Ini bangud suno sa natungdan, tuman kadako sa gihapon ang proteksyon nga mahatag sang bakuna agud malikawan ang severe nga COVID-19 infection.
Gin-ako man sang doktor nga tuman ang iya kaluoy sa ila mga pasyente nga nagasuprir sang severe COVID-19 bangud wala gid sang may nabaton nga bakuna batok sa virus.
Ini ang isa lang sa mga rason suno sa kay Jurao kun nga-a gina-promote niya ang COVID-19 vaccination.
Apang panugyan niya sa DOH, importante nga i-monitor ang mga indibidwal nga naka-eksperyensya sang adverse event following immunization.
