ILOILO CITY- Amat-amat na nga naplantsa sa Probinsya sang Iloilo ang mga lideres nga magainupdanay para sa May 2022 elections.
Sa interview sang Bombo Radyo kay Governor Arthur Defensor Jr., iya ginpahayag nga sa iya pagpakigsapol kanday Third District Representative Michael Gorriceta kag Fifth District Representative Boboy Tupas, naistoryahan ang ila pag-updanay apisar nga lain-lain ang ila partido–si Defensor ang myembro sang Partido Demokratiko Pilipino- Lakan ng Bayan (PDP-Laban) samtang myembro naman sang Nacionalista party ang duha ka kongresista.
Suno kay Defensor, nahitso man ang lideres sa municipal level nga amo ang magapapili sa masunod nga election ilabi na ang mga reelectionist ukon ang mga incumbent leaders.
Sa bahin naman naman sang mga lideres nga matapos na ang termino, ginpahayag sang gobernador nga isa ini sa padayon pa nga ginaplastar.
