ILOILO CITY- Isa ka uncontested elections ang ginalauman nga matabo sa Probinsya sang Iloilo sa Mayo 2022.
Ini kasunod sang tikang sang mga lideres gikan sa nagkalain-lain nga partido nga mag-merge ukon mag- updanay nalang.
Sa interview sang Bombo Radyo kay Iloilo 2nd District Representative Michael Gorriceta, iya ginpahayag nga mayorya sa kabanwahanan sa probinsya ang may yara na sang mga naplastar nga mga kandidato kun sa diin kalabanan sa ila ang mga incumbent nga magapa- reelect ukon magabayluhanay sang posisyon apang wala sang mangin kasumpong.
Suno kay Gorriceta, ini ang ila nahisugtan man kasunod sang pagsinapol nila ni Governor Arthur Defensor Jr. kag iban pa nga mga opisyal sa probinsya.
Apang, gintuad sang kongresista nga sa bahin sang Sta. Barbara, Iloilo, may yara lang sang pila ka kompromiso kon sa diin suportahan ni Gorriceta ang magapa-reelect nga si incumbent Mayor Rema apang suportahan naman ni Gov. Defensor ang magabalik nga si former Mayor Dennis Superficial.
Sa bahin sang New Lucena, posible man nga may ibunggo kay incumbent Mayor Liecel Mondejar Seville nga amo si incumbent Vice Mayor Jeffrey Araneta nga kaalyado ni Gorriceta.
