ILOILO CITY- Napadala na sang Local Government Unit sang Dumangas, Iloilo kay 4th District Representative Braeden John Biron ang kopya sang ginpasar sang Sangguniang Bayan nga resolution nga nagaduso nga malakip ang banwa sa service area sang MORE Electric and Power Corp. (MORE Power).
Sa interview sang Bombo Radyo kay Mayor Ronaldo Golez, iya ginpahayag nga siya mismo ang naghingyo sa municipal council nga magpasar sang resolution.
Suno kay Golez, luyag sang banwa nga makatilaw sang barato nga balayran sang kuryente nga sarang ma-provide sang MORE Power bangud sa subong, P12.20 per kilowatt hour (/kWh) ang ila ginabayaran sa idalom sang serbisyo sang Iloilo Electric Cooperative (ILECO) 2.
Dugang pa sang alkalde, ini agud matuman man ang handom sang banwa nga mangin economic zone kag mas maganyat ang mga investors kun barato ang balayran sa kuryente.
Nagalaum naman ang alkalde nga ma-explore sa kongreso paagi kay Rep. Biron ang posibilidad nga malakip sa service area sang MORE Power ang Dumangas kag iban nga banwa sa 4th District.
