Hugot nga nagapangabay sa Iloilo City Environment and Natural Resources Office (CENRO) ang pamunuan sang Zumba Exercises sa Iloilo Esplanade nga pahanugutan ang ila pagpatigayon sang outdoor exercise.
Sa interview sang Bombo Radyo kay Sol Yurac, presidente sang isa ka Zumba Group sa Iloilo Esplanade, iya ginpahayag nga makadto sila sa CENRO agud pormal nga makalisensya.
Ginpat-od sang natungdan nga indi magnubo sa 25 ang ila myembro kag lunsay fully vaccinated na sila.
Dugang pa niya, kabahin na sang ila kabuhi ang pag-ehersisyo kag indi bastante nga ginahimo lang ini sa sulod sang balay.
Mas bentaha suno sa iya nga ma-igo man sang sanag sang adlaw ang isa ka indibidwal samtang naga-ehersisyo agud nga malikawan ang nanuhay-tuhay nga balatian.
