ILOILO CITY- Ginbweltahan ni Senate Minority Leader Franklin Drilon si Presidente Rodrigo Duterte may kaangtanan sa mandu sini indi pagpatambungon sa Senate investigation may kaangtanan sa ginaalegar overpriced COVID-19 supplies ang iya mga cabinet members.
Sa interview sang Bombo Radyo kay Senator Drilon, iya ginpahayag nga unconstitutional ang ginahimo sang presidente bangud ang Korte Suprema mismo ang nagasiling nga indi mahimo balabagan sang presidente ang imbestigasyon sang Senado.
Suno kay Drilon, mahimo lang nga punggan sang presidente ang iya cabinet members kun may involved nga diplomatic secret, personal conversations sang presidente, kag kun may isyu sa national security.
Apang suno sa senador, graft and corruption ang ginaistoryahan gani concern ini indi lang sang senado kundi sang tanan nga pumuluyo.
Sa tion naman nga indi mag-atubang sa hearing ang cabinet members, ginpahayag ni Drilon nga madamo man sa gihapon sila sang makuha nga impormasyon gikan sa Pharmally accountants kag executives kag bastante ini nga mga ebidensiya agud mapamatud-an ang natabo nga korapyson sa gobyerno.
