Kwestyonable para kay radio broadcaster Salvador ‘Jun’ Capulot ang administrasyon ni Iloilo City Mayor Jerry Treñas sa syudad sang Iloilo.
Nahibaluan nga si Capulot ang nag-file man sang iya nga certificate of candidacy (COC) sa pagka-alkalde kag magapa-eleher sa idalom sang People’s Reform Party.
Sa interview sang Bombo Radyo kay Capulot, iya ginpahayag nga madugay na sa pulitika si Mayor Treñas apang kadamo sa gihapon sang pigado sa syudad.
Kaangay suno sa iya nga ang alkalde kag ang mga tinawo lang sini ang may pag-uswag sa kabuhi.
Suno kay Capulot, isa sa mga rason kun nga-a nadesisyunan niya nga magpadalagan, amo ang pagpakamalaot sa iya sang alkalde nga tubtob lang siya sa hambal kag wakal kag wala man sang hinimuan.
Sa iya pagpadalagan bilang alkalde suno kay Capulot, luyag niya pamatud-an nga indi lang maglutaw sa hangin ang iya mga ginabuy-an nga tinaga.
Gin-athag man sang natungdan nga apisar wala siya sang tinapusan bangud sa kapigaduhon, may ikasarang man siya sa pagserbisyo sang tampad.
Kalakip sa mga iduso ni Capulot amo ang transparency sa pagpangalagad sa pulitika ilabi na sa budget kag gasto sang syudad kag pagpasulod sang madamo nga investors agud mas mapasanyog ang ekonomiya sang Iloilo City.
