Nagapadayon sa gihapon ang trial sa korte sang isa ka naga-edad 100 nga lalaki nga gin-akusaran sang 3,518 Nazi war crimes sa Germany.
Bangud sa German privacy laws, gintago ang pangalan sang centenarian kay ‘Josef S.’
Si Josef ang nagserbe sadto bilang guwardiya sa presuhan sa isa ka Nazi concentration camp sang World War II kag nangin kahimbon sang krimen sa pagpatay sang linibo ka mga indibidwal.
Sang amo nga tion, linibo man ka mga preso ang ginbawian sang kabuhi bangud sa forced labor, pagkagutom, balatian, medical experiments kag pagpamintas.
Suno kay Bombo International Correspondent Aimee Andaya Hilger direkta sa Germany, ginpahanugutan sang 2011 court ruling ang prosecutions kaangay sini agud mahatagan sang hustisya ang mga krimen nga natabo sang wartime.
Bangud sa edad ni Josef, ginlimitahan lang sa duha ka oras kag tunga kada adlaw ang court proceedings.
