ILOILO CITY- Dugang nga palas- anon para sa mga drivers ang ginpatuman nga big- time oil price hike sa presyo sang gatong sa sulod na sang walo ka sunod-sunod nga semana.
Nahibaluan nga ginpatuman ang oil price hike kun sa diin P1.90 centavos ang dugang sa presyo sang gasolina kada litro; P1.50 sa diesel kag P1.40 sa kerosene.
Sa interview sang Bombo Radyo kay Russel Lasaleta, tatlo ka tuig na nga van driver nga may ruta Calinog, Iloilo – Ungka and vice versa, iya ginpahayag nga halos wala na sila sang madala pauli sa ila pamilya bangud sa pila ka semana na nga wala untat nga pagtaas sang presyo sang gatong.
Suno sa iya, labi na gid sila nga magapamigado subong ilabi pa nga ini man lang ang iya palangitan-an agud mahatag ang kinahanglanon sang iya pamilya.
Nagahingyo naman ang taxi driver nga si alyas Nono sa mga taxi operators nga maghatag sang konsiderasyon sa ila.
Suno sa iya, may mga operators nga nagapasaka man sang sukot sa arkila sa taxi sa pagpati nga naganami na ang byahe bangud naapaidalom na sa General Community Quarantine ang syudad.
Apang,sa pagkamatuod, tuman ka pigado sa gihapon ang ila kita ilabi na nga nagtaas ang presyo sang gatong.
