Naka-communicate na si Patrolman Jake Salgado sa iya mother unit nga Regional Personnel Holding and Accounting Unit (RPHAU) sa Police Regional Office (PRO) VI.
Si Salgado amo ang police officer nga assigned sa Jaro Police Station nga ginpasakaan sang kaso bangud sa ginapahayag tuyo nga pagpatay sa agent sang Philippine Drug Enforcement Agency (PDEA) sa Barangay Cabug, Bacolod City sang Oktubre 5.
Sa interview sang Bombo Radyo kay Police Major Harold John Pastrana, head sang RPHAU, iya ginpahayag nga nagpadala sang mensahe si Salgado sa Messenger kag nagpahayag nga wala ini sang kaangtanan sa amo nga krimen.
Ginpahayag sini nga na-frame up lang ang iya nga pangalan rason nga nagpa-blotter naman ini sa police station agud nga madepensahan ang iya nga kaugalingon.
Wala pa sini nabaton ang formal complaint sa kaso nga Frustrated Murder.
Nahibaluan nga suspendido na sa trabaho si Salgado halin sang Oktubre 1 kag tubtub sa Oktubre 31 bangud sa less grave neglect of duty. Nadakpan si Salgado sang 2020 nga nagahampang sang mobile game samtang on duty.
