Nag-sorry ang sexy actress nga si AJ Raval kay Kylie Padilla matapos gin-repost sini ang cheating allegation ni Aljur Abrenica batuk sa estranged wife.
Apisar wala may ginbutang nga caption si AJ, nag-angkon ini sang pagpakamalaot halin sa netizens kag gin-akusaran siya nga nagasawsaw sa isyu sang mag-asawa nga nagbulagay lima pa lang ka bulan ang nagligad.
Apang sa subong, deleted na ang gin-repost ni AJ nga statement ni Aljur sa iya facebook account.
Suno kay AJ, indi niya intensyon nga maghilabot sa away nanday Aljur kag Kylie.
Liwat man niya nga ginpanginwala nga kerida siya ni Aljur kag wala siya sang may ginaguba nga pamilya.
Ginpahayag man ni AJ nga plano niya nga magpahuway anay sa social media agud nga maprotektahan ang iya nga kaugalingon gikan sa mga bashers.
